بني خلاد 2035

12 January 2019 بني خلاد 2035

 

بني خلاد 2035 كيفاش تحب تشوفها

اليوم السبت 10/3/2035 , بما انه سبت، الكراهب ماعادش يدورو في بني خلاد و البلاد كلها تولي حافلة بالناس اللي خرجو بيت الفطور في الكياس لمة عائلية, و اللي على البيسكلات و الشباب اللي يلعبو في الشارع و الجري في وسط المدينة ولا هواية متع برشا ناس... يا حسره كيفاش كانو عايشين الدنيا مسكره بالسوق و الكراهب نهار سبت, و كنت كي تخرج تقضي تغامر بحياتك بالقفة و قضية و المادة اللي كلاها القهواجي... تو السلعه الكل متوفره كل يوم في المركز التجاري و الناس أصلا ولات تشري عالانترنت, و من وقت ما ولا فما محطة الترينو في بني خلاد و الميترو في تونس و نابل تحسنوا, ماعادش برشا عندهم كرهبة أصلا!

 

رئيسة البلدية اليوم العشيه عاملة اجتماع شعبي عام بالارسال المباشر من بيروها في دارها، و العائلات في ديارهم و في المكان العام, يتفرجوا فيها و هي تقدم برنامج التنظيم اللوجيستي متع المنتدى العالمي للسياحة الفلاحية اللي بش يكون في بني خلاد العام الجاي, و المتساكنين الكل يصوتو مباشرتا على اللي تقدم فيه الرئيسة, مثلا التصويت على شكون يكون مدير المنتدى و التصويت على الممولين للمنتدى و على الشركات اللي بش تقدم الخدمات الازمه, المتساكنين الكل يشاركوا في اخذ القرار من ديارهم او في المكان العام.

 

يا حسره كي كانت الاجتماعات في مبنى البلدية، وما يساهم في القرار البلدي كان شويه "رجال" اللي يحضرو. تو مبنى البلدية ولا فضاء عمل مشترك و مسرح، بما ان الحالة المدنية كلها تو عالانترنت, و البلدية متعاقدة مع المجتمع المدني و الشركات الخاصة لتقديم الخدمات البلدية. بكري كانو أعضاء المجلس البلدي، كل ما يقابلوهم يقولولهم الزبله الزبله الزبله... تو بني خلاد في قائمة المدن بلا فضلات بفضل مشاريع بيئية متواضعة بدات 15 سنة لتالي. تو المجلس البلدي مركز على التنمية والتسويق الترابي اللي يزيد يساعد في أصحاب المشاريع المنتصبة في الجهه بش يكبرو و يزيدو يخدمو ناس و يساهموا في مشاريع التنمية في المنطقة!

 

ترتيب بني خلاد في التعليم فاق كل التوقعات من 5 سنين الماضية, يا حسره في عام 2018 ترتيب بني خلاد في الوطن القبلي كان الثالث من الاخر, تو هاو الثاني بعد المعهد النموذجي, و هذا يعود لجمعية الاولياء اللي تأسست وقتها و شدة الصحيح في الخدمة مع النقابة بش التعليم يتطور و يكون عادل و الدروس الخصوصية مدعمه من جمعية الاولياء و زيد دخلوا برشا مبادرات رياضية و ثقافية بتمويل مشترك مع الأهالي بيدهم, اليوم الأهالي و الأساتذة فخورين برشا اللي ال 5 معاهد ثانوية في بني خلاد و لاو نموذجية و كيران تجي من مناطق البلاد الكل بولاد يقرأوا في بني خلاد.

 

اليوم امال الفرمليا اللي تسكن في مزنين، ما هيش بش تخرج ادور على الديار تتفقد المسنين، علخاطر اليوم تجيها الدرون من الصيدلية المركزية بالدوايات اللي طلبتهم على الانترنت. يلزمها تقعد في الدار تثبت هالحربوشه لعم شكون وهالقطر لخالتي شكون وتعمل برنامج الدورا متاعها مبعد.  المجلس البلدي 10سنين لتالي حارب على هالحل وتو بخدمة امال المشاكل الصحية نفيقو بيهم قبل ما الأمور تتعقد!

 

اليوم احمد اللي يسكن في سيدي التومي، عندو نهارين ما روحش للدار، هو والمهندسين متلمين فيي المخبر اللي في المنطقة الصناعية سيدي التومي، على بث مباشر مع السويد غاطسين ما رقدوش نهارين، البرمجية اللي تحول قشرة البرتقال الى بودرا بالليزر مشات بعد قداش من شهر تجارب، و هالاختراع المشترك بش يتقدم في السباق العالمي لمنتجات الفلاحية بعد جمعه في ستكهولم. الفكرة بدأت في معهد سيدي التومي لتكنولوجيا القوارص اللي كان فكره 10 سنين لتالي وكان تحدي كبير، علخاطر وقتها الخلالدية ماعادش يومنو بالبرتقال، اما وقتها مبادرات شبابيه مدنية متواضعة في ابتكارات من القوارص خلات بني خلاد اليوم وجهه عالمية لبحوث القوارص وفما احتمال كبير التعاون مع الجامعة السويدية بش يكون موفّق، بعد ما الجامعة اتصلت هي بسيدي التومي للمشاركة في هالسباق العالمي.  ياحسره كي كان الارسال خايب في سيدي تومي، حتى التلفون ما يخطفش, اما المجتمع المدني في سيدي التومي حارب تو 15 سنة لتالي و تو السويد و سيدي التومي الارسال ما يتقتطعش كأنهم فرد بيرو.

 

ساره في بير دراسن اليوم ما تخدمش, علخاطر ما تنجمش تستعمل كرهبتها نهار السبت, ساره صاحبت مشروع, كل يوم ماعدا يوم السبت اتدور تلم التنوه من قهاوي بني خلاد, و تستعملهم لزراعة الفقاع اللي تصدر فيه ل5 بلدان. ساره بمشروعها نقصت جي طرناطه زبلة عالبلدية من التنوه اللي تلم فيها, ضحكو عليها كي جابت الفكرة، وتو تخدّم في 8 اشخاص و Made in Bir Dressen و لا عنوان الجودة العالمين للفقاع. فتحي خو ساره استغل الفرصة وحل ورشات تدريب طبخ بالفقاع واخترع أصناف جديده من الاكل كلها بالفقاع وزيد حتى هو ولا يخدّم في 5 اخرين. فتحي عندو 4 سنين مللي بدا مشروعو بعد ما ساره ولا عندها طاقة انتاج محترمه، وتو جاووه ناس من 17 دولة وهذا يخليه يحدث 22 موطن رزق غير مباشر من ناس تسكن وناس توكل وناس تعمل بالزوار دورا في السواني.

 

هذا الكل مش مستحيل إذا اليوم نخدمو لغدوة... هذا مش مستحيل ويزينا من "مش متاعنا" و "ما يخليوكش" و "مازلنا بعاد" فما توانسة ماتو بش "يولي متاعنا" اللي يقول "مش متاعنا" ما يؤمنش بتونس و يكره الشباب في بلادهم, وهذا يوصل للتخربيش عالحيوط و الزطلة و الحلم الوحيد يولي الحرقة علخاطر "مش متاعنا"

 

اليوم لازم نخدمو لغدوة علخاطر اليوم يحكم على غدوة، إذا اليوم نعيشوه لليوم ولرواحنا، غدوة بش يكون اخيب وأصعب، كل يوم بحسابو والتاريخ ما يرحمش, و بش نكتبو تاريخ باهي برشا مع بعضنا!

 

انا هذا تصوري لبني خلاد 2035, وانت اشنوا تصورك...

No Comments

Post A Comment

Powered by themekiller.com